अस्ट्रेलिया टूरमा जाने नेपाली क्रिकेट टीमको तयारी
नेपाल क्रिकेट संघ (क्यान) का कार्यबाहक सचिव प्रशान्तविक्रम मल्लले नेपाली टीम सेप्टेम्बर अन्तिममा अस्ट्रेलियाको भ्रमण गर्ने तयारीमा रहेको जानकारी दिए ।
क्यानले अस्ट्रेलियाको इम्पायर स्पोर्टसले नेपाली टीमको सबै खर्च र त्यहाँका स्टेट टीमहरुसँग मैत्रीपूर्ण खेलको व्यवस्था गर्नेबारे छलफल अघि बढाएको मल्लले नेपालप्रेससँग बताए ।
नेपाली टीम स्कटल्यान्डमा हुने आईसीसी क्रिकेट विश्वकप लिग–२ अन्तर्गतको त्रिदेशीय सिरिजको तयारीका लागि क्यानाडा भ्रमणमा छ ।
स्कटल्यान्डको सिरिजपछि नेपालमा प्रशिक्षण गर्न मौसम अनुकूल नहुने भएकाले नेपाली टीम अस्ट्रेलिया जाने तयारीमा रहेको क्यानका महाप्रबन्धक वृतान्त खनालले बताए ।
‘खेलबारे मिति तय भएको छैन । नेपाली टीम अस्ट्रेलिया पठाउने तयारीमा लागेका छौं । चाँडै सबै जानकारी गराउँछौं’, खनालले भने ।
